Os vindeiros Venres 13 e Sábado 14 teremos a oportunidade de participar nas primeiras Xornadas de Mobilidade e Territorio do Morrazo, que terán lugar no Auditorio Municipal de Cangas. [ enlace á páxina das xornadas ]

Pareceume interesante contextualizar a situación en relación a mobilidade que se vive na comarca de O Morrazo antes do comezo das xornadas, para animar á cidadanía a participar sabendo certas cuestións clave:

O Morrazo é unha terra de grandes singularidades que converte a súas formas de relación e comunicación en algo especiais. Unhas son xerais, compartidas co resto de Galicia, e outras específicas. Estas singularidades non sempre son negativas para a mobilidade, ou polo menos, como no caso do transporte marítimo, poden converterse nun elemento positivo. Principais singularidades:

1_Dispersión da poboación: a humanización do noso territorio é total, as vivendas en Galicia espállanse creando un continuo habitado, sobre todo nas Rías Baixas. As comunicacións nun hábitat tan disperso fanse complexas, xa que para calquera desplazamento é preciso o uso do automóbil. Noutras realidades onde a poboación concéntrase en evidentes núcleos illados esta problemática non existe, xa que de forma peonil poden realizar a maioría de funcións diarias (ir ao mercado, visitar o médico, mercar o periódico, tomar un café...).

2_Condición de península: condición que de algunha maneira independízate ou íllate do resto. Ningunha gran vía de comunicación vehicular ou ferroviaria atravesa O Morrazo , dende a antigüidade arrastra un déficit importante, pensemos que se alguén pisa a comarca é porque intencionadamente quería pisala, nunca estás de paso a outro lugar.

3_Orografía complexa: non encontramos ningunha gran montaña pero si innumerables pequenas elevacións que dificultan e encarecen o trazado de vías “cómodas”. Pensemos no corredor, un pequeno tramo de dous carrís e 15Qm de lonxitude que custou 440 millóns de euros !!

4_Transporte de ría: trátase dun excelente medio que nos une dunha forma rápida e eficaz (no mar non hai atascos) coa urbe máis importante de Galicia. Despreciar esta vía de comunicación sería absurdo.

Atendendo a esta situación e, por suposto á sustentabilidade (tan de actualidade nestes intres), tres arquitectos moañeses afrontan a mobilidade como un problema ao que lle dar unha resposta alternativa e real dende tres puntos de vista distintos. De feito, veñen organizando encontros nos que explican as ideas básicas das súas propostas, independentes pero complementarias. Así, vamos a expoñelas brevemente:

“A costa como vía horizontal”_Juan Fernández Rivas:Planea e aposta por unha vía de comunicación ligada a costa dende Meira ata Aldán. Destaca o feito de que a maior parte do percorrido é horizontal, sen grandes pendentes, ideal para andar e ir en bicicleta. Por suposto o coche estaría excluído nesta proposta de 20Qm de lonxitude dos que a meirande parte xa están realizados. Fala tamén da posibilidade de situar unha estación intermodal nas proximidades de Rodeira ligada coa conexión ao corredor. vídeo

“Transporte colectivo no Morrazo”_Martiño barreiro:Fai un estudio ou simulación interesante de como podería funcionar un “sistema de sistemas” de transporte no Morrazo, englobando varios medios como o autobús (cun sistema GPS que sincronice os semáforos para dar prioridade ao transporte público) e o barco nun único billete. vídeo

“Mobilidade sen coches”_Rodrigo Currás:Aposta claramente polo transporte público colectivo fronte ao uso do coche de forma individual, o barco, o autobús e o tranvía deberían ter máis protagonismo. Fomenta o uso das bicicletas facilitando as subidas de fortes pendentes mediante sistemas mecánicos.

Das tres propostas podemos extraer a columna vertebral e denominador común a todas elas, que a modo de pequeno guión sería o seguinte:

-Aproveitamento das infraestruturas existentes.

-Fomento do transporte público colectivo.

-Uso da bici como medio de transporte individual.

-Non ao uso indiscriminado do coche.