Os 250.000 habitantes que ten censados a cidade e os outros tantos que cada día entran e saen con destino a municipios limítrofes como Cambre, Culleredo, Oleiros ou Arteixo son unha carga demográfica excesivamente grande para Alfonso Molina. A situación de punto final da Coruña é outra das causas dos constantes problemas de tráfico da avenida, que debe absorber os vehículos procedentes de polígonos industriais como a Grela e Pocomaco, os procedentes dos campus universitarios da Zapateira e Elviña, os dos barrios de nova creación como Mesoiro, ou a conexión coa autoestrada AP-9 que, ademais dos coches que se dirixen cara ao sur de Galicia, tamén recibe no seu tramo final aqueles que transitaron pola autovía A-6, unha das grandes conexións viarias de Galicia co resto de España.

 

A apertura da terceira rolda -en construción- preséntase como unha das grandes esperanzas para desconxestionar Alfonso Molina, xa que a nova vía aliviaría o tráfico de diferentes partes da cidade. A infraestrutura preséntase como imprescindible para desaloxar vehículos dunha avenida que nos últimos meses agravou a súa situación coa apertura dun centro comercial e a construción de centos de novas vivendas nas súas marxes.

 

Os seus tres carrís por sentido de circulación -aos que hai que sumar aqueles que facilitan a incorporación a outras vías- non dan máis de si: ao redor de 160.000 coches en días laborables saturan a principal arteria da cidade.