O pleno da corporación terá que decidir sobre a presentación do recurso contra a orde do 27 de xaneiro da Consellería de Medio Ambiente, Territorio e Infraestructuras que non outorga a aprobación ao PXOM de Teo. Este punto debaterase na sesión ordinaria do mes de febreiro, que se celebrará o próximo mércores 24.

Os partidos con representación na corporación decidirán se o recurso se presenta ou non por ser competencia deste órgano. A aprobación provisional do Plan Xeral é competencia do pleno polo que esta decisión tamén debe ser adoptada por este órgano.

O alcalde de Teo, Martiño Noriega, confía nos partidos da corporación e “animo  aos concelleiros/as a que non pechen ningunha vía de defensa dos intereses xerais do Concello de Teo”. O alcalde xa explicou durante a Comisión de seguimento do Plan Xeral, celebrada o pasado 9 de febreiro, que o grupo de goberno traballaba en dúas vías para solucionar a problemática derivada da non aprobación do Plan Xeral de Teo por parte da Xunta de Galicia. 

Por un lado o equipo redactor traballa na cumplimentación da orde do 27 de xaneiro de cara a unha aprobación definitiva. Sen embargo a asesoría xurídica tamén redactou un recurso de reposición, un documento xurídico técnico que terá que resolver a Consellería de Medio Ambiente, Territorio e Infraestructuras. Este documento, sobre o que ten que decidir o pleno a semana que vén, solicita unha aprobación parcial do Plan Xeral tendo en conta que as deficiencias sinaladas pola administración autonómica só afectan a áreas determinadas e concretas que permitirían desenvolver o planeamento do Concello con coherencia, como recolle o artigo 85.5.a da LOUG no que se fala da aprobación do planeamento urbanístico dos Concellos.